賀芬咸赦咗惡「仁」

猪拉多纳

弱勢殘陣慳番啖氣

德甲賀芬咸主場迎戰拜仁慕尼黑，今場形勢一面倒，雙方實力懸殊，計近況亦地獄與天堂之比，拜仁大勝應無懸念，如果佢哋只諗住贏兩球，班球員大可輕鬆到唔使出汗，如果認真啲，贏到5粒亦唔過分，但點講都好，1.6倍「讓球客勝」開出機會極高，仲要有買趁早。

（有線61及64台周日晚10時30分直播）

賀芬咸正深陷降班危機，即使換帥亦無助，新帥馬高古斯過去喺凱沙羅頓出名擅守不擅攻，但賀芬咸本身防線太弱，佢嚟到幫到嘅有限，最慘係佢哋保守踢法令球隊原本嘅攻擊力都冇埋，近期對手實力非強都連輸3仗，而且場場捱打冇乜還手之力，現時跌到尾二席位，護級前景相當悲觀。
留力6日後護級戰好過

賀芬咸今晚仲要有半隊主力唔出得，除咗基斯馬干、施巴斯坦魯迪同沙利荷域等繼續養傷外，中堅迪比亞上仗對奧格斯堡亦加入傷兵行列，另外隊長安達斯碧克同新加盟即成為中場領袖嘅波蘭斯基又雙雙累積5面黃牌停賽，實力弱上加弱。不過Oliver認為咁對佢哋嚟講係好事，皆因今場橫掂都唔夠踢，不如畀兩大主力洗底兼抖足精神，留番6日後榜尾護級大戰對格雷特霍夫至搏殺。
拜仁弗爆輪換都勒唔住

未計尋晚賽果，拜仁喺榜首有17分優勢，重奪冠軍係遲早問題，由於啱啱踢完德國盃，今場好可能會作出輪換，不過佢哋班後備既質高亦搶韁，球隊爭位踢情況激烈，而且狀態勇得交關，就算教頭軒歷基斯想勒都勒唔住，佢哋嚟緊嘅歐聯對阿仙奴之戰9日後至踢，今場根本冇留力需要，軒帥都樂意見到球隊繼續保持強勢。
Oliver 推介：

拜仁慕尼黑讓球勝 ★★★★

科隆勝 ★★★

1860慕尼黑細 ★★★