熱刺「大」宴阿仙奴

猪拉多纳

歡聚倫敦

加里夫巴利弗爆歐洲、禾確特轉型sharp醒，呢對前修咸頓師兄弟將於「北倫敦打吡」中鬥入波！英超熱刺主場鬥阿仙奴，主隊「巴利仔」紅爆2月，轟入7粒遇神殺神，「禾仔」轉打前鋒亦威力倍增。近年兩軍對戰例多波入，大盤仲有1.62倍分頭，有買趁早啦！

（有線300及200台周一凌晨零時直播）

「北倫敦打吡」屬英格蘭著名打吡戰之一，熱刺、阿仙奴仇恨極深，一直視對方為死敵，所以每次碰頭都火花四濺，不時梅花間竹入波，齋睇入球已經令球迷如癡如醉。去季熱刺於聯賽一度領先兵工廠10分，但最後被死敵搶走第3位，更撞着車路士捧歐聯，就算攞第4今季都冇得踢歐聯，熱刺領隊保亞斯話球隊上下，都冇辦法忘記呢次慘痛經歷，目前兩軍又為前4打生打死，今場必去到盡，好可能係入球騷。

今仗賽前，阿仙奴領隊雲格話唔會用特定戰術箝制「巴利仔」，相信係熱刺球迷佳音。老實講，熱刺1月尾至今表現唔算特別好，但一個加里夫巴利已經夠殺。呢名「紅面仔」多次憑個人之力入波，怒爆、罰球、遠射都得心應手，狀態弗到冇朋友。熱刺前鋒丹普西有傷缺陣，艾迪巴約又唔弗，佢哋的確已變一人球隊；但如果嗰個係超人，又有乜所謂？「巴利仔」一日未熄火，都係入球保證。
近5次對賽喪入28粒

阿仙奴禾確特同樣來自「聖人」修咸頓，但早一年上正規軍，係「巴利仔」師兄。今季終於畀佢恨到打前鋒，「禾仔」好爭氣已轟入10個聯賽入球，效果非常理想。雲格話，佢鍾意己隊成條鋒線都識入波，事實上亦抵佢招積，普多斯基、基奧特同辛迪卡索拉，已合共攻入28球，事實上佢哋四個於首循環對熱刺各入1粒，認真犀利。

睇埋對賽近績，更加搵唔到理由唔捧大。近5次對賽，雙方一共炮製28個入球，一場平均幾乎入到6球；而近13次聯賽對賽，亦開出12口大。
食埋呢餐就知邊個係一哥

今場除咗關係到下屆歐聯入場券，亦係兩隊爭做倫敦一哥嘅關鍵戰。兩軍今季總共踢咗7場倫敦打吡戰，結果同樣取得4勝1和2負成績，所以邊隊贏波將會名副其實坐穩倫敦一哥寶座。