紅魔半力打殘金絲雀

猪拉多纳

朗尼孭飛加操備戰皇馬

講起曼聯，相信球迷最緊張嘅都係下周中對皇馬場歐聯生死戰，不過唔好忘記佢哋今晚仲有英超主場對諾域治呢碟「小菜」㗎！紅魔今季英超靠住強大火力所向披靡，雖然費Sir肯定會放眼歐聯留力，但朗尼極有可能為操弗而上陣，要生擒防線唔掂嘅「金絲雀」冇難度，當然捧1.78倍「讓主」啦！

（有線200及300、廣東體育周六晚11:00直播）
傑斯千戰賽前續約1年

費格遜早排受訪時話，由於隊波內部競爭大，個個都好珍惜每次落場機會。小妹都同意佢嘅講法，雖然紅魔陣容唔算星光熠熠，但夠穩定兼鬥心強，所以就算費Sir講明今仗會出副選，為下周中對皇馬場歐聯大戰留力，都唔代表會放過諾域治。特別係尋晚同紅魔續約1年嘅傑斯將擔正領軍，呢場仲係佢第1,000場正式比賽，又點會想失威？

早排受傷患困擾搞到缺操一排嘅朗尼，好可能為咗操起狀態喺今場踢正選，加埋查維亞靴南迪斯呢位今季上陣26場就攻入15球嘅高效率射手，想大破諾域治場均失超過1.5球嘅防線，又有咩難度先？
諾域治死火7場得1勝

至於諾域治近況就非常唔掂，近7場只係砌低過呢排跌Watt嘅愛華頓，而且其中5場冇波入，明顯啞晒火，根本睇唔到有復甦嘅迹象。最攞膽係，「金絲雀」自1989年起就未試過喺聯賽作客贏紅魔，似乎去到奧脫福球場就冇運行，今場無論係近況定往績對佢哋都相當不利，睇嚟都要吞飽蛋至准離開奧脫福喇！