祖雲達斯贏「玻」冇難度

猪拉多纳

入球分布點廣信心爆棚

意甲今晚爆發榜首大戰，由「阿二」拿玻里主場迎戰衞冕嘅祖雲達斯，儘管有傳「前球王」馬納當拿或會入場幫舊東家打氣，可惜拿玻里正陷低潮，要阻擋近況唔錯嘅「斑馬兵團」全取3分似有一定難度，平手盤捧1.72倍客勝。

（廣東體育周六凌晨3:45直播）
拿玻里卡雲尼鬧入球荒

馬納當拿近日現身拿玻里，雖然大部分人關心嘅係佢嘅欠稅問題，但就盛傳「前球王」想入場睇吓呢場意甲爭冠戰，幫愛隊打吓氣。之不過，拿玻里近況唔多掂，5場不勝不特止仲要零入球，對住森多利亞及烏甸尼斯亦只能攞到1分，未能把握「祖記」失分收窄積分榜上嘅差距，家陣同榜首已有6分距離，如果今場贏唔到，奪冠希望就會變得更加渺茫。最令拿玻里球迷擔心嘅，莫過於王牌前鋒卡雲尼已經超過1個月冇進帳，就算呢位射手出名係「祖記殺手」，今場亦唔多靠得住。
維達爾踩「前球王」撐場冇幫助

至於「一哥」祖雲達斯近排雖然輸過畀羅馬，但近5場贏足4場證明狀態其實唔錯，加上入球分布點向來夠廣，近排各自有「士哥」嘅保羅普巴、胡仙歷、馬特尼等都各有數胡能力，至於維達爾唞完之後相信可以回復高水準表現，佢仲自信爆棚到喺賽前話美斯一早超越咗馬納當拿，連「拿玻里之神」都敢踩低，擺明唔將對手放在眼內喎！邦路斯就實際啲，講明今場嘅目標係全取3分打沉主要爭冠對手，拿玻里對住戰意旺盛嘅「祖記」，保住1分都偷笑啦！
兩隊射手駁火做「大」騷

拿玻里同祖雲達斯呢兩支意甲死對頭一旦交手，從來都係攻個你死我活，睇番兩軍嘅對賽往績，相同賽程近6次就有5次開入球大，雖然話拿玻里近況頹頹哋，未必可以延續近6次喺主場不敗嘅局面，但係有咸錫同卡雲尼兩大射手壓陣，肯定同大踢進攻足球嘅「斑馬軍團」駁火，死都要死得好好睇睇吖嘛，所以1.95倍入球大值捧！