前田遼一人見人怕

猪拉多纳

畀佢開齋嗰隊必降班

數近季日職最強本土前鋒，肯定非磐田山葉射手前田遼一莫屬，這名31歲前鋒已經連續8個賽季取得雙位數入波，2009及2010年更兩度奪得日職神射手，不過日職流傳有個人見人怕嘅「前田魔咒」好值得大家留意，原來自2007年起計，邊支球隊畀前田遼一取得當季首個聯賽入球，最終命運都係降班收場，各支球隊見到前田真係要醒醒定定。
飛腳成上季受害者

前田近6季開齋嘅比賽，磐田山葉未必贏到波，不過對手畀佢攻破大門卻一定冇運行。由2007年開始，前田每季射入個人首個聯賽入球嘅對手，季尾聯賽排名都唔高過17位，全部都要降班收場，其中最經典一定係上季嘅大阪飛腳。飛腳上季於第3輪遇上山葉，結果被前田開齋射入1球輸1比2，自從日職於1993年成立，大阪飛腳從未試過降落乙組，原本以為飛腳可憑雄厚嘅歷史背景及實力逃過一劫，點知之後飛腳愈踢愈沉，完全冇晒昔日王者霸氣，結果去到聯賽煞科日，飛腳再次遇上山葉，前田亦再次入波協助山葉贏2比1，一手一腳將飛腳送落乙組。

睇番數據，前田於07及08年因為季初受傷，要去到10輪聯賽打後才告開齋，如果近4季冇病冇傷，最遲第5輪聯賽已經取得首個士哥，最慘仲係之前五支慘中「前田魔咒」嘅球隊，山形山神、京都不死鳥、東京綠茵、千葉市原目前仍在乙組角逐，甲府風林亦要經過3年努力才於2011年重返日職，今季邊隊畀佢攻入首個入球都咪話唔驚！
磐田山葉今季首5輪秩序

2/3 作客vs名古屋鯨魚

9/3 主場vs大宮松鼠

16/3 作客vs橫濱水手

30/3 主場vs鳥棲砂岩

6/4 作客vs浦和紅鑽