車仔唔想重賽速拆米堡

猪拉多纳

英格蘭足總盃第5圈今晚仲有好戲，米杜士堡喺主場越級挑戰車路士唔似偷到雞，首先米堡借用嘅救星麥伊治蘭無緣倒戈，其次車仔為咗避免「魔鬼賽程」出現，肯定唔想重賽，1.9倍「讓球客勝」要吼實！（now635台及廣東體育周四凌晨3:45直播）
米杜士堡中前場唔齊腳

米堡仲有機會踢升班附加賽，借將麥伊治蘭好大功勞，但今仗除咗佢唔踢得外，新簽嘅紐卡素前鋒森美艾美奧比，以及翼鋒戴亞都唔符合資格上陣，包括射手祖基域斯在內幾件有傷，殘陣擋車好難爆得出。

另一方面，車仔日前喺聯賽以0:2慘負曼城，英國傳媒又話領隊賓尼迪斯畀班球員造反圍插，唔滿意佢嘅戰術咁話，依家車仔喺聯賽畀熱刺過埋頭，肥賓肯定更唔安樂。仲有呀，根據當地傳媒消息，假如車仔搞唔掂米堡，只能夠安排喺3月4號重賽，到時車仔就要面對8日踢4場嘅「地獄賽程」。

或者聯賽對西布朗、歐霸盃對布加勒斯特星隊唔算太惡啃，但車仔晉級嘅話，3月10號就會喺足總盃8強遇到曼聯，除非肥賓真係諗住搞冧車仔走人，否則為咗爭聯賽前4名、歐霸盃同足總盃，冇理由想整多場重賽畀球員歎，既然射手丹巴巴亞可以踢足總盃，有佢幫手應該可以順利解決對手。