聖日耳門法足盃再起「賽」

猪拉多纳

賓帥領軍輸完例反彈

今晚賽事以盃賽做主打，阿King想同大家傾下法足盃16強「國家打吡」巴黎聖日耳門主場迎戰馬賽，兩軍剛於聯賽碰頭，結果聖門輕取對手，「萬人迷」碧咸在這場法甲處子戰贏盡掌聲，預計會乘勝追擊，主勝值得追多鋪。

（周四凌晨3時55分開賽）
碧咸上仗對馬賽交足貨

聖日耳門今季大灑金錢，當然希望喺各條戰線有所作為，法足盃亦係目標之一。雖然今仗有王牌射手伊巴謙莫域停賽，但該隊勝在兵多將廣，仍有拿維斯、加美路等可用，其中新加盟嘅碧咸依然寶刀未老，上仗鬥馬賽後備入替有份策動伊巴嘅埋齋士哥，表現交足貨，教練安察洛堤都話今仗想畀佢踢正選。馬賽梗係想喺死敵地頭搞寸party喇，可惜明顯力有不逮，最致命係作客表現打折扣，特別係踏入2013年，5場作客僅得1勝，贏個場仲要係上圈法足盃對低組別球隊魯昂，今仗難擋來勢洶洶嘅聖日耳門，主勝冇甩拖。
串明古迪斯細施禾利大

另一場法足盃賽事，非聯賽球隊明古迪斯上兩圈皆喺法定時間悶和對手，僅靠互射12碼先晉級，攻力欠銳。儘管今仗對手南錫實力高幾班，但連輸3場狀態曳爆，加上心繫護級無心爭盃，悶鬥悶下唔慌多波入，最好捧細盤。最後荷盃施禾利主場對燕豪芬，施軍歇冬後首戰曾作客爆冷擊敗對手，燕豪芬梗係想報番一箭之仇，以中位數3.5球計，雙方近6次交手5次開大，看來呢場都係入球騷，大盤咪錯過。