禾堡遇弱嚟料「客」窒奧芬巴克

猪拉多纳

德國盃4場8強戰分今明兩晚上演，今晚直播賽事係丙組仔奧芬巴克主場對禾夫斯堡，禾堡今季投資大，聯賽已經冇乜好爭，德國盃成為交代嘅唯一途徑，難得抽到弱旅當然要把握機會，1.46倍客W可視為過關重心，單頭捧埋2.3倍「讓球客勝」。

（無綫翡翠台周三凌晨3時30分直播）
換帥後漸入佳境

禾夫斯堡季前耗資逾3千萬歐元擴軍，惜前教頭馬加夫始終執唔掂，會方終於去年底換帥，喺新教頭赫基帶領下禾堡正重返正軌，前仗0比2不敵大超班嘅拜仁表現已經收貨，上仗對緬恩斯踢唔夠30分鐘就要打少個，作客能夠攞番1分亦算唔錯。禾堡目前雖然淪為德甲尾4，但本身人腳潛力仲有上升空間，既然已拋離尾3嘅奧格斯堡9分，唔使擔心降班，佢哋上圈能淘汰利華古遜顯見對德國盃重視，今晚最強陣容出擊勝望甚濃。

主隊奧芬巴克向來有主場威力，今屆德國盃亦先後淘汰過格雷特霍夫同杜塞爾多夫，佢哋季前曾經被視為升上德乙嘅大熱門，但經過大半季演出令人失望，目前排到12位距離護級安全線只有6分，會方兩周前換帥，搵咗上季喺德乙奧厄被炒嘅無業教頭舒密特領軍，雖然領軍後首仗即以2比0贏沙貝魯根，但主場贏弱旅未足反映有幾大進步，呢位崇尚進攻嘅少帥近日轉踢法亦換埋隊長，相信球隊仍要時間去執，今晚面對質高兩皮嘅禾堡，應該好難發圍。
弗賴堡唔赦緬恩斯

至於頭場緬恩斯主場對弗賴堡勢均力敵，弗賴堡對德國盃有野心，球隊目前喺聯賽排第5，上輪主場同前4名嘅法蘭克福賽和失分，但務實教頭史特拉希話並唔失望，佢話弗賴堡係細會，如下季要兼顧歐洲賽事隨時會得不償失，故對聯賽已無奢求，故可更集中精神踢德國盃。緬恩斯近3場都和，上仗主場人多打人少都贏唔到禾堡，狀態一般，加上兩軍近兩次碰頭都係和波，呢場推介弗賴堡「讓球客勝」。

（周三凌晨2時開賽）