雙「燕」射手開「大」片

猪拉多纳

今晚荷蘭甲組聯賽爆發激戰，「一哥」燕豪芬會作客飛燕諾。飛燕諾雖然保持主場不敗紀錄，不過佢哋喺歇冬後表現反覆，實在令人難以捉摸。不過好在兩軍射手最近入球停不了，「大」手交易在所難免，1.5倍「入球大」用嚟過關都唔錯。（now639台周日晚7:30直播）
燕豪芬作客照喪攻

飛燕諾歇冬後表現失準，近4場一共失咗7球，連對住護級球隊施禾利都可以3度失守，就知佢哋防守有幾差。不過首席射手加斯安奴柏利腳風又真係幾順，4場射入4球，佢個隊友千達迪迪維希拿最近亦重拾佳態省入3粒，兩人今仗肯定施展渾身解數，趁對方中場悍將雲邦美、守將派達斯唔踢得，努力爭取入球以抵銷後防失誤。

榜首嘅燕豪芬同樣有一對狀態着火嘅拍檔，比利時射手梅頓斯連續5場成功破關，加埋本土新星韋拿杜姆近5場轟入6球，以飛燕諾近期表現好難頂住兩人嘅聯手夾擊。而且燕豪芬作客絕不保守，所以11場聯賽作客賽事可以攻入34球咁多，但同時只得1場冇失波，呢類攻擊力超群但唔追求零封對手嘅球隊，真係「入球大」嘅恩物。睇埋兩軍交手紀錄連續3場開大，更令人放心追捧！