愛斯賓奴不可破

猪拉多纳

馬體會歐霸激鬥未回魂

今日阿King重心推介係西甲馬德里體育會主場鬥愛斯賓奴，馬體會剛於歐霸盃出局被打窒道氣，相反愛斯賓奴近六場聯賽五勝一和未輸過，捧「讓球客勝」。

（now 632周一凌晨2時直播）

馬體會今季主場所向披靡，可惜兩周前於歐霸盃三十二強首回合輸畀魯賓卡山，全勝金身被打破，結果上周中次回合雖然贏番對手1比0，總成績仍以1比2被淘汰，對士氣或多或少有影響。射手法卡奧踏入下半季狀態回落，攻擊力明顯冇季初咁銳利，而且球隊周中將要作客西維爾應付西班牙盃四強次回合，心態上未必會搏盡。
馬體會留力西盃

愛斯賓奴自從由墨西哥教練艾古爾執教後戰績冒升，歇冬後除輸過畀巴塞隆拿，其餘六場聯賽五勝一和，而且艾古爾早年曾經帶領馬體會殺入歐聯，對卡達朗球場並不陌生，今次重返舊地冇有怕。

另外兩場心水，荷甲飛燕諾主場鬥燕豪芬，燕豪芬今季曾經兩勝對手，不過兩次都有主場之利，佢哋今季聯賽作客勝率不足六成，面對牌面較弱嘅奈梅亨、華域克都贏唔到。飛燕諾係目前荷甲唯一一支主場不敗球隊，受讓可取。（now 639周日晚7時30分直播）

最後西甲尾場貝迪斯主場鬥馬拉加，貝迪斯聯賽四場不勝兼冇入波，主場出擊都冇着數，但馬拉加剛於歐聯惡戰波圖，匆匆再戰未必可以及時回氣，入球細係投X首選。

（now 632周一凌晨4時直播）