費倫強勢反彈小讓值博

猪拉多纳

意甲博洛尼亞主場對費倫天拿，費倫天拿歇冬後成績不濟，但本身實力遠勝主隊，加上上仗對國際米蘭終於回復勁旅本色，踢出本季代表作，Ali相信佢哋可以借勢重新衝擊前列位置，費倫天拿作客讓得起平半，上盤係全日重心所在。（周日晚10時開賽）
博洛尼亞質庸態差

費倫天拿根本有意甲頂班級數，會方亦以爭奪下屆歐聯參賽資格為目標，不過歇冬後好似撞咗邪，無論攻守都出現好多不必要錯誤，球運亦極差，歇完冬頭6輪聯賽輸咗4場，排名急跌，不過上輪終於強勢反彈，面對勁敵國際米蘭全場壓住對手狂攻，結果大炒對手4比1，佢哋成場波踢到水銀瀉地，攻門鏡頭此起彼落，如果運氣好啲，波膽好應該係「主其他」，贏完一場咁爽嘅波，全隊信心返晒嚟，雖然今仗有中場大將大衞比沙路停賽，但歇冬期由巴黎聖日耳門來投嘅施素高足以取代佢，對球隊戰鬥力影響唔大。

博洛尼亞計級數根本冇得揮，近況亦沉，近5輪聯賽只贏過降班膽佩斯卡拉，上次主場面對實力平平嘅錫耶納都贏唔到，連一向倚靠嘅主場威力都冇埋，今晚面對當起勁旅更加難踢。Ali相信費倫天拿會維持強勢，把握機會全取3分。
Ali 推介：

費倫天拿上盤★★★★

帕爾馬勝★★★

國際米蘭大★★★