聖人抖足2周無懼喜鵲法術

猪拉多纳

今晚英超有場「英法大戰」，以土炮當家作主嘅修咸頓作客「法國兵團」紐卡素。修咸頓自新帥普捷天奴領軍後，表現煥然一新，上仗更戰勝勁旅曼城，相反紐卡素剛赴凍到震嘅烏克蘭踢歐霸盃攰到爆，加上傷兵滿營，難贏以逸待勞嘅「聖人」，「讓球客勝」有計。

（有線301及201台周日晚9時30分直播）
紐卡素舟車勞頓

雖然阿根廷教頭普捷天奴一月尾接替艾堅斯執掌修咸頓時，曾惹來唔少非議，但做領隊一向都係用成績說話，普帥接手後四場搶到5分，輸畀曼聯嗰場喺奧脫福攻到主隊氣咳，上仗仲犀利，主場以3比1擊敗曼城，「聖人」嘅前場壓迫打法，搞到曼城好難舒服咁組織攻勢，贏得極有說服力。睇番佢哋上仗十八人大軍名單，有十二個係嚟自英倫三島，喺近年充斥外援嘅英超嚟講，「聖人」咁重用土炮實在難得。

相反紐卡素走上另一極端，經過冬窗瘋狂入貨後，陣內已經有成十名法國兵，加埋講法文嘅柏比斯施斯、迪奧迪等非洲球員，話喜鵲係「法國兵團」亦不為過。不過上周中歐霸作客冰天雪地嘅烏克蘭米達列斯，都咪話唔凍到震，當地得番零下4度，喺嚴冬作賽令球員消耗更大，加上舟車勞頓後匆匆再戰，真係攰到爆。況且「喜鵲」仍有大衞辛頓、賴恩泰萊、賓艾化、丹高士寧及高法蘭等十字兵，面對接近兩周冇比賽、氣勢如虹嘅修咸頓，主場出擊都信唔過。