巴塞搵西維爾出氣

猪拉多纳

歐聯輸波一肚火

今晚西甲壓軸大戰，巴塞隆拿返到魯營主場迎戰西維爾。周中歐聯作客AC食咗一記悶棍嘅「地上最強」，前線球員冇啖好食之餘，後防仲失咗2球，敗走0:2，搞到班波谷埋一肚火，唔發洩吓點得呀！今晚一於博佢哋發火，開個1.42倍「讓球主勝」啦！

（now632台周日清晨5:00直播）
硬仗連場戰績有交代

巴塞周中迎來近一個月以嚟首場敗仗，只因對手AC米蘭戰術得宜，中後場球員執行指令嘅紀律性強，令美斯同恩尼斯達等活動空間大減，同時前線反擊亦產生一定威脅，可以話係AC近年嘅代表作。不過邊隊可以出線8強，暫時仲係言之尚早，睇埋第二回合先啦，始終魯營有佢哋嘅威力喺度，乜嘢事都可能發生！

今晚對完西維爾，巴塞就要喺聯賽同西班牙盃連續對死敵皇馬兩次，跟手就踢歐聯次回合對AC嘅生死大戰，名副其實係魔鬼賽程。雖然好多球迷認為巴塞近期跌晒Watt，不過咁講好似唔太公平囉，佢哋之所以跌Watt，好大程度因為季初長期處於巔峰狀態，贏波贏到唔識停而帶畀大家錯覺，依家狀態有所調整，絕對合情合理。何況所謂嘅跌Watt，近7場4勝2和1負，兩場和波係分別對皇馬同華倫，輸嗰場就係啱啱嘅歐聯首回合，咁嘅成績唔算好差啫！
西維爾聯賽9場作客不勝

「張峰」覺得美斯、恩尼斯達同法比加斯等前線球員今晚會爭住挺身而出，肩負起入球重責，務求重返勝軌。況且西維爾近9場聯賽作客未贏過，今晚去到魯營腳仔軟一啲都唔奇，再者佢哋防守紀律性咁差，後防不時出現漏洞，相信入楔能力咁強嘅法比加斯，大有機會繼首循環梅開二度後再度數胡，今晚一於撐「讓球主勝」睇巴塞上演入球騷！