千「守」皇帝降魔救「細」

猪拉多纳

QPR窄場遇強例有計

「地獄主場」勁「窄」使！昆士柏流浪話就話排榜尾，但自從「千『守』皇帝」夏利列納接任領隊後，呢班波嘅表現大幅改善不特止，就連洛夫度斯路球場都變「地獄主場」，踏入2013年已經守和過熱刺同曼城兩支勁旅，都咪話唔堅！QPR咁急搶分脫離降班漩渦，今晚面對有朗尼缺陣嘅曼聯有望「守」得雲開，2.1倍細好路。

（有線200及300、廣東體育周六晚11:00直播）
接連悶和熱刺 曼城

坐得18,500人嘅洛夫度斯路球場受制於本身規限，一直都唔能夠大幅度擴建，觀眾席同球場距離非常接近，効力過QPR同曼聯嘅名宿保羅柏加前日受訪嗰陣話，呢個窄場嚴重影響邊路球員發揮，好容易畀QPR守將嘜死，預言路爾斯華倫西亞、艾舒利楊格同拿尼呢啲翼鋒冇運行喎！

保羅柏加唔係靠嚇，事關QPR最近主場對住曼城同熱刺都保持清白之身，強如今季場場作客有波入嘅熱刺，去到洛夫度斯路球場都咬唔入QPR，連弗到漏油嘅加里夫巴利都冇符，足證呢個場係幾咁「窄」使！
朗尼病毒感染冇隨隊

冇錯，雖然曼聯係英超入球王，但朗尼因為病毒感染冇隨隊去倫敦，尹佩斯同韋碧克兩位前鋒始終太柔，面對QPR雙中堅基斯杜化森巴同曉爾呢啲大隻佬，要搵食唔係咁容易。最重要一點，就係「紅魔鬼」大拿拿拋離次席嘅曼城成12分咁多，會唔會場場去盡好難講，計戰意，肯定唔夠水深火熱嘅QPR咁旺盛。

對家QPR賽前仲收到好消息，就係鋒將凱列特已經復操，需知道呢位加拿大國腳有速度，「防守大師」夏利叔又可以順勢玩死守，再擺凱列特同森莫亞喺前線突擊，就算偷唔到雞，都一定唔會大敗，橫睇掂睇都係玩細最着數。
昆士柏例開半和

歷來11次喺英超鬥曼聯，昆士柏只係攞過2分。

曼聯連續5場波開入球細。

昆士柏對上8仗有5場開半場和。
唔敢搶攻博半場「窿窿」

對住「一哥」曼聯，相信昆士柏就算有地利都唔敢貿貿然搶攻，況且呢支倫敦球隊新季只係入得19球，點睇都唔似會喺「紅魔鬼」條防線度搵到着數。睇番昆士柏近期戰績，對上10場波有6次係半場打和，仲要劑劑開半場0:0波膽，今仗嘅半場「窿窿」波膽有2.95倍，玩得過吖！