史篤城爛仔波劫「富」

猪拉多纳

今晚英超早場富咸主場對史篤城，「豬頭骨」史篤城早排經歷魔鬼賽程纏擾，搞到連番受挫，但呢隊波韌力十足，已漸入佳境，等閒之輩要擊敗佢哋，並唔容易。更何況富咸攻力差，首席射手貝碧托夫踢法偏向柔性，面對史篤城硬朗打法，肯定冇啖好食。富咸讓波一於揀史篤城「讓球客勝」。

（有線300及200台周六晚8時45分直播）

史篤城上年年尾曾連續十場聯賽不敗，但今年連盃賽單計90分鐘，首八仗竟得三和五負，皆因連番遇上勁旅，其中四場敗仗分別輸畀曼城、車路士同阿仙奴，實在唔好太苛責。上仗擊敗雷丁，總算打開今年勝利之門，打破心理樽頸，對球員士氣有好大鼓舞作用。以史篤城根底，只要踢番順，根本唔驚同級對手，就算作客贏唔到，要力保不敗而回，仍然綽綽有餘。
富咸讓唔起博埋和

富咸亦唔係醒，中前場球員入球產量偏低，貝碧托夫水準唔穩定，填補唔到丹普西離隊後嘅空缺。富咸讓波好大程度因為喺主場對賽往績佔優，但此一時彼一時，富咸班波高唔過史篤城，史篤城受讓相當着數，除咗「讓球客勝」之外，亦可冷敲和波。