畢爾包讓唔起皇蘇

猪拉多纳

傷兵成籮「雄獅」走晒樣

「雄獅」畢爾包今晚會喺西甲主場迎戰皇家蘇斯達上演「巴斯克打吡戰」，雖然今仗係主隊教練比爾沙掌帥後第100戰，但傷兵滿營嘅畢爾包應難贏近況大勇嘅皇蘇，都係捧1.65倍「讓客」划算。

（開賽時間：周六凌晨4:30）
蒙尼恩未好番 洛蘭迪頂硬上

今晚畢爾包嘅「瘋子」教練比爾沙會達成喺呢支西甲球會嘅「百戰里程碑」，係佢33年教練生涯首次喺一支球隊領軍場次達3位數字，不過喺呢個大日子，畢爾包想用贏波做禮物就頗有難度喇！除咗蒙尼恩未好番、迪馬高斯又未必踢得，要靠雪到硬嘅洛蘭迪頂上外，獲比爾沙喻為「隊內榜樣」嘅古柏治，更因為腳傷要做手術，無論前線同後防實力都大幅削弱。

除咗傷兵問題外，今季嘅畢爾包明顯同上季打入歐霸盃、西班牙盃決賽嘅「雄獅」判若兩隊，早排佢哋雖然大炒馬體會3粒，但呢場亦係佢哋近8戰嘅唯一勝仗，連主場迎擊愛斯賓奴都要吞4蛋，又點會贏到近6場不敗嘅皇蘇先？客軍兩大攻擊手卡路士韋拿、干沙路卡斯度近5場合力炮製6個入球，狀態弗到漏，分分鐘射瓜埋班「走樣雄獅」添呀！