弗賴堡法蘭克福開入球騷

猪拉多纳

「德甲星期五」今晚上演「大」翻身好戲，弗賴堡會喺主場對法蘭克福，主隊嘅麥斯古斯同客軍嘅美亞，原本都係籮底橙，依家就變成搶手貨，呢對前聖保利舊將應該好想喺對方面前攞威，呢場「蛋散大翻身」吼實1.8倍入球大最好。

（有線64及204周六凌晨3:30直播）

弗賴堡今季突然又爆發，主要原因係攻擊點夠晒多，不過講到最搶鏡，當然係24歲中場麥斯古斯，佢係雲達不來梅青訓產品，但當時完全唔受重用，直至09年轉投聖保利，捱足3季至得到弗賴堡賞識，今季開始真正上位，個人喺聯賽交出6個入球、6次助攻，過去嘅霉氣可以話一掃而清。
法蘭克福作客頻頻失波

對手法蘭克福今仗雖有前鋒乾貴士停賽，但又唔代表今場入唔到波，事關佢哋嘅30歲中場美亞真係弗到冇人有，開季至今喺聯賽攻入12球，入球數字只係少過3大射手傑斯寧、文迪蘇傑同羅拔利雲度夫斯基。其實喺漢堡出道嘅美亞，際遇比麥斯古斯更淒涼，01年被外借到聖保利，幾年都冇咩波踢，回歸法蘭克福後都唔見得特別受重用，直至上季時來運到攻入17個聯賽入球，今季佢繼續有料到，目標當然係博掛靴前拎番份厚約，既然法蘭克福近10場作客得1場保持清白，好大機會同弗賴堡合演入球騷。

猪拉多纳