巴塞超班攞A

猪拉多纳

地上最強硬闖聖西路

歐聯奪標大熱門巴塞隆拿，周四凌晨於16強首回合作客聖西路火併AC米蘭。所謂無敵係最寂寞，巴塞隆拿喺西甲目空一切，球員都踢到冇晒癮，反而歐聯大戰可望激起戰意，比賽時亦會更加認真。另外巴塞賽前有好消息傳出，就係沙維及恩尼斯達都可復任正選，強陣出擊有望大炒「紅黑兵團」，今場揀「讓球客勝」。

（有線61及201台周四凌晨3時45分直播）
巴神「缺陣」AC難反抗

兩支球隊上季先後喺分組賽及八強對賽，而巴塞取得2勝2和不敗佳績。雖然上季賽績顯示巴塞作客未能大炒AC，但要留意當時AC陣容好過依家，伊巴謙莫域、柏圖及尼斯達等主力都尚在陣中，自然頂得住巴塞來犯。如今三線球員質素大幅下滑，根本唔夠力度抗衡強敵。本來新加盟嘅巴洛迪利係變數之一，奈何「巴神」之前代表過曼城出戰歐洲賽，今場只能坐喺場邊為AC打氣。今季AC人腳質素大倒退，只靠一個艾沙拉維喺前場衝鋒陷陣可謂難成氣候。

而最重要一點，AC幾日之後要進行米蘭打吡戰，或多或少會影響到球員作戰心態。唔好忘記AC上季聯賽兩個循環都輸畀國際米蘭，老闆貝魯斯干尼嬲到出煙，教練阿里基都唔想再次惹怒話事人。
沙維恩尼斯達復出助攻

巴塞聯賽放到甩轆，球隊早就將目標鎖定為歐聯，而沙維及恩尼斯達復出，更令Tiki-taka威力進一步提升。實在所有人都睇到AC正處低潮期，巴塞又點會放生佢哋，一於喺客場盡數打好個底，次回合返到魯營球場就踢得更輕鬆，「讓球客勝」可捧。
數讀歐聯

06 巴塞18次作客意甲球隊，取得6勝7和5負

07 AC曾7次主場對巴塞，取得2勝2和3負

08 巴塞近11場歐聯作客贏了8場

11 AC曾23次主場對西班牙球隊，取得11勝6和6負，近6次都贏唔到

15 兩隊15次對壘，巴塞取得6勝5和4負