波圖主戰馬拉加谷星搶Ｗ

猪拉多纳

當歐聯係「展銷場」

本周中繼續上演歐聯16強首回合賽事，葡萄牙球隊波圖先喺主場火龍球場對西班牙馬拉加。近幾年波圖踢歐洲賽唔差，主要原因係球隊毋須為聯賽成績而擔心，可全副精神擺落歐洲賽；相反馬拉加仍要為聯賽第四名擔驚受怕，以其陣容總難兩面兼顧。巨高料波圖首回合有力取得領先優勢，1.6倍主W捧得過。

（有線62及202台周三凌晨3時45分直播）

波圖於葡超惡到打橫行，就算派二線兵落場一樣可以贏波，故此球隊可以全情投入喺歐洲賽當中。對上10個球季波圖曾贏得前歐洲足協盃、歐聯及歐霸盃，歐洲賽成績唔差得過其他歐洲一線名牌球隊，實在波圖打歐洲賽特別醒神，與商業理由有好大關係。

除咗話歐洲賽事獎金豐富之外，波圖亦擅將歐洲舞台轉化為「球員展銷場」，瘋狂推銷陣內高質球員，好似兩大射手侯克及法卡奧，同樣係透過歐洲賽去證明身價。每當推銷對象成名及被媒體唱紅之後，波圖都會盡早放售，以賺取高昂轉會費，所以多年來葡超就算叫座力不及英超及西甲，但球迷都好少聽到波圖孭債要成日問人借錢餬口咁可憐。
積臣馬天尼斯新紮射手

繼法卡奧之後，今季波圖又sell緊另一位哥倫比亞球員積臣馬天尼斯，呢位前鋒暫時喺葡超輕輕鬆鬆入咗20球，質素唔使懷疑。相信積臣馬天尼斯今場對馬拉加肯定會打正選，若果連入幾球的話身價勢必再度提升。作客嘅馬拉加當然有番咁上下實力，但礙於作客表現唔突出，今場未必夠波圖砌，主W有1.6倍值得捧場。
韋利卡巴尼路頂得兩嘴

馬拉加目前陣中最炙手可熱嘅球星肯定係上年攞到歐洲金童獎嘅西班牙小將伊斯高，不過球隊今仗能否全身而退，阿根廷籍門將韋利卡巴尼路演出可能更加關鍵。馬拉加上周末聯賽主場小勝畢爾包一比○，建功者雖然係沙維奧拿，但教練比歷連尼賽後承認，若非韋利卡巴尼路於比賽中作出多次精彩撲救，球隊未必可以全取三分。
歐聯不敗最大功臣

韋利卡巴尼路曾經代表阿根廷贏得2001年世青盃冠軍，同前鋒沙維奧拿當時已經係隊友，佢喺2011年初加盟馬拉加，同年十月以480分鐘打破球會最長時間不失球紀錄，去年三月對愛斯賓奴時左手曾經受傷骨折，但無損其比賽信心，今季首次參加歐聯即有亮麗演出，連附加賽在內一共上陣七次，有五次能夠保持不失，係馬拉加今季於歐聯未輸過嘅最大功臣，而且波圖一對哥倫比亞箭頭組合積臣馬天尼斯及占士洛迪古斯，今季於各項比賽加埋已經攻入超過三十球，韋利卡巴尼路如果守得住大門，次回合肯定好踢好多。
數讀歐聯

37 波圖歷史上曾經37次遇到西甲球隊，成績為12勝5和20負。

06 馬拉加於分組賽6場不敗。

03 波圖今季喺歐聯主場已錄得3連勝。

01 馬拉加近12場歐洲賽作客只曾1敗，當時發生喺02/03球季歐霸盃(前稱歐洲足協盃)嘅八強次回合，而最邪門係對手屬於與波圖同市嘅博維斯塔，而02/03年歐霸盃冠軍就係波圖。