祖記強勢狙擊內訌雌狼

猪拉多纳

家和萬事興，家衰口不停！意甲羅馬啱啱換完帥，又再爆出爭射12碼風波，雖然話主人翁奧斯華度知衰公開道歉，但想話一時三刻挽回低落士氣，睇怕唔易。今晚佢哋喺主場迎戰3連勝氣勢勁爆嘅「一哥」祖雲達斯，就算受讓平半都玩唔過，安高推介1.88倍上盤。

（中央5台周日凌晨3:45直播）
羅馬傷兵多士氣曳

「雌狼」羅馬早前辭退老帥施文，改由佢助手安達素利領軍做看守教練。正當大家以為呢個曾經跟過施文同史巴列堤兩代主帥嘅教頭，會同球員關係好兼夾熟知球隊運作，有望扭轉形勢，點知上場第一擊就作客森多利亞反輸1:3，最離譜係比賽途中領先1球嗰陣，仲爆出前鋒奧斯華度搶去一向由隊長托迪操刀嘅12碼兼宴客，家陣奧斯華度就變咗過街老鼠，即使托迪已公開呼籲球迷原諒佢，都好似於事無補。

球隊士氣差，最慘今鋪仲撞正傷兵潮，麻煩前鋒奧斯華度有膝傷在身，中場費奧倫斯就感冒纏身缺操，連防中迪羅斯都話大腿有傷，估計佢3個就算可以及時趕及上陣，表現都大打折扣。

祖記呢邊，意甲連歐聯3連勝氣勢大盛，雖然中場大腦馬治斯奧停賽，但有老將派路同愈踢愈好嘅維達爾喺中場輪流分波，配合前線馬特尼同胡仙歷都腳風咁順，使驚冇波入？仲有，祖記近4季造訪羅馬錄得3勝1和，擺明食住主隊，今鋪讓波唔多，值得捧場。