高隆有本錢輸得起

猪拉多纳

阿甲騎呢賽制造就默契波

歐霸盃啲賽果夠晒騎呢，真係一地蕉皮加一地眼鏡碎，估唔到咁多對眼（目及）住，仍然可以咁出面，所以話一雞死一雞鳴，蠱惑波邊度掃得晒。大家可能冇留意，唔單止呢邊船頭起火，其實另一邊廂都靜靜起革命，Deal兄講嘅係南美自由盃，連續兩日都有名牌死火，小保加半場lead住倒輸，專喺主場搶分嘅甘美奧亦喺首輪賽事輸畀智利侯治柏度，不論賽前買定係追走地，一樣跣到攤攤腰。

鬼咩，一早話呢個世界咁多支水，你顧得呢邊，嗰邊又會郁手，班老細計數叻過精算師，而且全部都係機會主義者，明年巴西世界盃乜頭乜路係未知之數，班老細依家已經開始做嘢同部署，今夏洲際國家盃殺埋身之前，當局仍然好鬆懈，差佬都係打份工，上頭未落order都未使做嘢住，呢個空檔就啱晒班老細。
今季點輸都唔會降班

南美波暫時得阿甲開番，Deal兄收到風，南美班老細暫時唔會「過大海」搞歐洲波住，始終風頭緊，今日要留意場高隆主場對聖馬田聖祖安，阿甲降班計累積三季分數，各隊可以輪流不斷失分都唔愁即刻降班。剛過去嘅阿甲春，聖達菲聯就孭起晒啲負分，19戰7和12負，到依家阿甲秋又有另一支球隊抽中生死籤，高隆位於聖菲，係聖達菲聯兄弟球隊，依家大把分喺手，今季點輸都唔會降班，首戰就大敗畀拉魯斯，今場點買唔使問喇啩！

（周日早上6時15分開賽）