利華拆「堡」出氣

猪拉多纳

歐霸失利成肚火

今季歐洲賽仲以為德甲球隊一定威威，但就周四晚嘅歐霸嚟講，四支德甲分子無一隊贏波，真係讚壞咗佢哋。當中利華古遜主場被賓菲加擊敗，出線16強機會凍過水，今晚德甲利華繼續主場出擊，面對弱旅奧格斯堡，要贏番場激勵吓士氣，「讓球主勝」係我選擇！

（有線61及201台周六晚10時30分直播）

講真，兩軍實力有好大差距，首循環對碰利華古遜作客都贏3比1，今晚主場贏面只會更大，本身佢哋主場7勝2和1負，勝出率達7成，故此歐洲莊家亦開出利華讓一球低水，可見佢哋對利華相當有信心。雖然利華歇冬後聯賽4戰僅得1勝，其中兩場主場賽事，分別贏法蘭克福及僅以2比3不敵爭標分子多蒙特，可見利華對住中下游球隊始終有把握，加上主力如傑斯寧、舒賀爾尼、路菲斯等都冇病冇痛，可以隨時候命，上周停賽的中堅奧馬托柏克又可復出，兵力充裕靠得住。
奧格斯堡火力超弱

反觀奧格斯堡歇冬後4場不敗，但計落只係1勝3和，而對手只係杜塞爾多夫、禾夫斯堡之流，可以話未遇上真正強隊，所以小妹覺得奧軍係時候「獲利回吐」，同埋佢哋入球能力超弱，21輪比賽僅得17球，對住回復「夫添」嘅利華後防想破網？難啲囉！
Wedny推介：利華古遜 讓球主勝