奧咸鬥拖肥 翻炒半場大

猪拉多纳

甲組奧咸主場挑戰英超「拖肥糖」愛華頓，主隊今季聯賽成績麻麻，甚至有降班危機，但勝在有份大無畏精神，尤其喺自己地頭經常大踢進攻足，上圈足總盃以3比2爆冷淘汰利物浦，更屬代表作，再鬥另一支默西賽德郡球隊愛華頓，隨時又演入球騷。大盤熱爆有晒啟示，想博取好回報，不妨直取半場大。

（now 635周日凌晨2時直播）
奧咸淘汰紅軍有辦睇

奧咸聯賽排尾四，好大程度上因為踢法有前冇後，主場更往往不遺餘力推前搶攻。呢招有辣有唔辣，順起上嚟入波接踵而至，上圈半場已攻入利物浦兩球，令人刮目相看。不過後防空虛亦導致失球高企，近十二場賽事都有失，平均一場失超過兩球。而且好多時上半場已失守，遇上高兩級嘅愛華頓，更難保清白之身。

愛華頓防線亦唔算穩陣，早前主場對住今季跌晒Watt嘅阿士東維拉，竟然都失三球，領隊莫耶斯有必要執吓條防線。不過今仗對手只係甲組弱隊，預料莫帥仍會採取主動，盡快奠定勝局，以免步利物浦後塵，相信上半場已經有波入，大盤1.48倍略嫌乏味，2.15倍半場大更值博。