三獅雙箭瞄準雄心 撐噴射機贏波開P

猪拉多纳

今日踏入第200場澳職里程碑嘅紐卡素噴射機，主場迎戰「作客蟲」墨爾本雄心，憑住希斯基同布歷捷斯重組「英格蘭U18雙箭」喺前線搵食，要贏波慶祝只係簡單任務，1.82倍主W依絲執。

（有線64及204周五下午4:30直播）

紐卡素噴射機上輪作客輸畀西悉尼流浪者，5場不敗走勢雖然斷咗纜，但係主場硬淨嘅佢哋，近4次地頭出擊2勝2和就足證氣勢猶在，加上教練加利雲艾蒙首次安排希斯基同布歷捷斯正選落場，呢對前英格蘭U18隊友熟悉對方打法，勁有默契，今鋪再度喺前線並肩作戰肯定勁煞食，要贏波賀球隊踏入澳職200大關易過借火。

另邊廂嘅墨爾本雄心，近8仗澳職主場4連勝、作客4連敗，「主客分明」不特止，佢哋除咗喺開咧戰嘅「墨爾本打吡」砌低勝利，至今作客都冇贏過波，雖然後衞高洛斯莫同隊長費列特歷高今場傷愈復出，不過首席射手泰迪治斷腳趾要抖3至5個禮拜，前線火力大減，更何況班波每逢作客就自動「降呢」，憑咩阻人哋贏波開Party先？