熱刺主W明醒「里」

猪拉多纳

艾迪巴約回歸有貨交

歐霸盃戰火重燃，其中一場矚目賽事由兩支分組賽不敗之師交手，熱刺主場迎擊里昂。熱刺主帥保亞斯歐霸經驗豐富，加上前鋒艾迪巴約歸隊，今仗可望擊敗喺歇冬後表現反覆嘅里昂，1.6倍主勝穩陣之選。

（有線61及201、廣東體育周五凌晨4:05直播）
里昂歇冬後勁跌Watt

熱刺近10場聯賽取得6勝4和，有此佳績少帥保亞斯應記一功，呢位葡萄牙教頭曾喺2011年幫波圖攞過歐霸盃冠軍，今屆帶住熱刺絕對有睇頭。雖然射手迪科爾避戰，但多哥前鋒艾迪巴約回歸，上仗後備落場即交出助攻，配上近3場狂轟4球嘅加里夫巴利，有力攻破任何大門。值得留意嘅係門將洛里斯上年夏天先由里昂轉會熱刺，有佢報料更有助保亞斯作針對性部署。

相反里昂自歇冬後表現欠穩，先喺法總倒灶出局，上場輸畀里爾係球隊近15個月以嚟聯賽首次2連敗，2場敗仗一共失6球，就連主帥加迪都承認球隊現時缺乏信心，冇乜起色。加上佢哋今場有射手利辛度盧比斯、拜恩特唔踢得，另一前鋒米高巴斯圖斯又被借去史浩克04，前線得番近5場入得1粒嘅巴菲迪比高美斯掛帥，攻守都唔掂，睇怕今場難逃一敗。