撐利物浦 『紅』運當頭

猪拉多纳

西布朗內亂有隱憂

新正頭，梗係要「紅」運當頭啦！今日大年初二，英超上演獨腳戲利物浦主場對西布朗，紅軍近排喺晏菲路演出火紅火綠取得3連勝場場大炒對手，恃住由蘇亞雷斯領導嘅爆紅鋒線，要炒正陷內亂嘅西布朗可謂易如反掌，1.82倍嘅-1「讓主」等收利是啦！

（有線200、300及廣東體育周二凌晨4:00直播）

咪以為利物浦近5戰只得1勝就話佢哋狀態差，查實撇除戰意成疑嘅足總盃不敵奧咸之戰，其餘4場聯賽分別只係輸畀「一哥」曼聯，但先後踢和勁旅阿仙奴同曼城，對住弱旅諾域治更係大炒5:0。再睇埋佢哋近3場主場戰，全勝共入12球而未失1球，晏菲路威力真係唔講得笑。

講到底，紅軍近排狀態復甦，同佢哋條鋒線愈嚟愈生性絕對有關，「哨牙蘇」實力早已經獲得公認，佢喺近10場波竟然射入7個波及交出5次助攻，成為球隊進攻泉源。至於季中加盟嘅新星史杜列治亦都先後射破「紅魔鬼」同曼城大門，係個射術、速度兼備嘅球員，依家佢同「哨牙蘇」逐漸擦出火花，賽前消息話佢有望及時傷愈披甲，加埋快翼史達寧又話可以復出，呢條鋒線絕對有躋身英超一級嘅潛質。唔好唔記得，佢哋後備席仲有個新加盟嘅巴西兵菲臘比古天奴，係踢過國米嘅扭得之人，領隊羅渣士想點變陣都冇問題。
奧丹維治 史提芬列特嘈交

西布朗呢邊，自從12月底開始，連埋足總盃計已經連續8場未贏過，共得2和6負，狀態明顯跌入低谷。佢哋喺1月底爆出箭頭奧丹維治扭計離隊失敗鬧劇，家陣慘被視為反骨仔針對，力奇收到風，佢上星期就試過喺球會醫療室同隊友史提芬列特嘈交，正所謂家衰口不停，對士氣都咪話唔大打擊。

更令力奇擔心嘅係，狀態低沉嘅佢哋，近6場聯賽作客波就輸咗5場，就算話中場穆林保啱啱踢罷非國盃回歸，趕得切復任正選，但又撞正後防主力哥蘭波波夫停賽，仲點頂得住紅軍？仲有個搞笑數據，西布朗原來自1969年3月10日嘅周一贏過新特蘭後，近18次喺頂級聯賽嘅周一賽事都未嘗勝果，呢個「周一魔咒」隨時玩謝佢哋。
利物浦連開12口大

‧西布朗今季12場作客聯賽全有失球。

‧西布朗連續8場不勝。

‧利物浦連續12場比賽開大。

‧利物浦連續3場主場保持清白身。
2.25倍半場大好路

利物浦已經連續15場取得入球，遇上今季作客例必失波嘅西布朗，難怪入球大熱到得1.54倍。若嫌無肉食可以選擇2.25倍嘅半場大，事關利物浦近10場聯賽，有8場只係打咗半場，就可以同對手一齊炮製出2個或以上入球，以現時紅軍嘅鋒力加上後防偶爾發波瘟，半場大有機o架。