多蒙特 漢堡開賀歲入球騷

猪拉多纳

今日係年廿九，大家食完團年飯之後，可以睇埋多蒙特對漢堡呢場德甲大戰做甜品。多蒙特歇冬後愈戰愈勇，「波蘭孖寶」巴拉斯塞高斯基同羅拔利雲度夫斯基每場都有進帳，對手漢堡亦有孫弘民喺前場威脅「蜜蜂軍團」大門，不過兩隊波同樣係攻強守弱，今場入球大細中位數改做3.5球，2.1倍入球大最抵博。

（有線61及中央5台周六晚10:30直播）
波蘭孖寶入球停不了

多蒙特踏入2013年後，聯賽取得3連勝，總共入咗11球，平均1場入超過3球，射手羅拔利雲度夫斯基亦出嚟闢謠，否認過檔拜仁傳聞，講明會專注今季比賽，今晚硬撼漢堡，當然要加多兩錢肉緊數胡啦！

漢堡今季表現雖然令人失望，但就彈出咗個前鋒孫弘民，上月底贏雲達不來梅3:2場波，呢位韓國新星先開紀錄嗰球，已經成為小弟心目中今季德甲最佳入波之一。孫弘民有技術同射術、兼且膽識兼備，前線有佢同拉脫維亞前鋒魯迪尼夫斯在陣，入波就唔成問題。問題係漢堡有前無後嘅踢法都好危險，今場都係唔好諗邊隊贏，一於和和氣氣，要個入球大，務求兩隊合演入球騷賀新年啦！
頂占筍盤：多蒙特（入球大）