作客王沙士菲威畀「人」睇

猪拉多纳

阿甲「閉幕賽」Kick Off

代表下半季嘅阿甲「閉幕賽」聽朝揭開戰幔，力爭包攬兩階段盟主之位做總冠軍嘅沙士菲，會出訪實力平平嘅小阿根廷人，憑強大火力加上作客醒神嘅特性，唔難打響頭炮，1.92倍客勝要捧！

（開賽時間：周六早上8:15）

阿甲喺2012至13球季由以往分開春季聯賽同秋季聯賽決出2個冠軍，改為依家分為「開幕賽」同「閉幕賽」兩循環，最後會由2階段「一哥」打多場附加賽決出1個總冠軍，為嘅只係更強代表性。沙士菲喺「開幕賽」以5分帶甩次席紐維爾舊生封王，強大火力係佢哋稱王本錢，休季期間球會向熱拿亞買斷射手柏拉圖，士氣大增，又向西甲華倫西亞借入阿根廷國腳中場加高，爭標決心相當大。

球隊賽前就小阿根廷人個主場較細作針對性練習，最令力奇放心係佢哋嘅作客賽績，「開幕賽」沙士菲作客10戰取得7勝2和1負佳績，係阿甲作客王，仲勁過佢哋主場戰績，今鋪又點會甩拖吖！

小阿根廷人「開幕賽」排15位，雖則前鋒荷西費南迪斯重傷休戰半年後，終於回歸候命，但想佢咁快有成績交出唔易。再者，守將米基爾托倫因傷長抖，由高隆借嚟巴拿沙頂住，冇默契或會成為防線漏洞！

猪拉多纳