布基納法索好「細」界

猪拉多纳

鐵桶陣頂加納

非洲國家盃四強今晚爆發，尾場由布基納法索硬撼「黑星」加納。上屆魚腩部隊布基納法索，今屆令人刮目相看，憑固若金湯的防守，四戰不敗爆冷殺入準決賽，絕對唔係善男信女。基於與決賽只有一步之遙，相信加納實力再強亦唔敢貿然搶攻，斯維認為今場細盤有計。

（now 676周四凌晨2時30分直播）

布基納法索上屆分組賽三戰全敗出局，估唔到今屆入到四強，而且仍然保持不敗，其實布軍整體實力並非有太大提升，今屆踢咗四場比賽有三場和波，近兩仗90分鐘都係同對手互交白卷，可見佢哋只係憑鬥志，每人走多一步，配合穩固的防守頑強抗禦對手。相反要布基納法索入波，恐怕亦唔容易，尤其係今場對手加納實力更強，預料布基納法索會沿用穩守戰術，希望利用突擊偷雞，甚至死守博以互射十二碼分勝負。
「黑星」穩陣唔搶攻

加納除咗首仗打和剛果民主共和國2比2，近三仗演出漸入佳境，取得三連勝兼冇失波。不過來到準決賽，球隊難免小心為上，預計唔會壓得太上搶攻。事實上，加納除咗隊長基恩之外，「黑星」亦缺乏另一穩定攻擊點，只要布基納法索打番出前幾場嘅守勢足球，相信加納都係老鼠拉龜冇碇埋手，一於要入球細。