葡萄牙難讓厄瓜多爾

猪拉多纳

C朗牛一兼有傷勒住踢

國際熱身賽葡萄牙主場對厄瓜多爾，牌面上葡萄牙佔優，一來人腳好，二來有主場。不過葡萄牙踢國際賽表現差已經出晒名，今場未必可以擊敗厄瓜多爾，「讓球客勝」係唔錯嘅選擇。

(有線155台周四凌晨4時45分直播)

葡萄牙近三場比賽面對俄羅斯、北愛及加蓬，三支球隊實力都唔算太強，但葡萄牙都冇法取得一場勝利，情況令球迷相當之擔憂。查實葡萄牙球員對於國際賽唔上心已經唔係新鮮事，尤其踢熱身賽就更加顯得「懶洋洋」。縱然領隊保羅賓圖已積極為球員作心理調整，希望佢哋可對國家隊比賽更加投入，無奈球星要為所効力球會交代，勒住踢都好難怪。
厄軍排名急升有料到

仲有，葡萄牙隊長C朗喺2月5日生日，加上有傷在身，今場未必會以正選身份落場，對葡萄牙爭勝會構成極大影響。至於厄瓜多爾方面，呢支南美代表嘅水平正不斷提升，世界排名更急升到12位，絕對有能力與葡萄牙「鍊到底」，厄軍受讓抵玩。