比利時球星請纓「大」匯演

猪拉多纳

教頭想hea都冇得hea，外流兵發火搶韁！比利時國家隊領隊韋莫斯早已將焦點放喺下月底世盃外圍賽作客對馬其頓嘅大戰，今晚國際熱身賽主場鬥斯洛伐克，基於各地聯賽未有間斷，韋莫斯原本向足總建議，今場無關重要嘅熱身賽唔選所有海外球員，以免佢哋奔波勞碌搏到殘，寧畀機會本土小將同老將代表吓國家隊，不過一班外流球員群起發圍，認為國家隊爭位情況激烈，唔肯放棄今晚為國上陣機會，結果韋莫斯服從多數，徵召強陣出擊，今晚主場面對講明要演練前鋒破關能力嘅斯洛伐克入波唔會少，Anton推介1.9倍大盤。

（周四凌晨3時45分開賽）
向斯洛伐克開火

韋莫斯順應民意點強兵，主場面對實力較弱嘅斯洛伐克，當然主攻求勝，不過佢早已放風，會畀更多機會一批老將有更多上陣時間，加上防線有華美倫同高柏尼等主力因傷缺陣，韋莫斯宣布用3號門將，効力拖連奴嘅桑基列特擔任正選，防線亦會倚重雲拜頓同雲丹美，防線換人下默契未必維持到，但球隊中前場人腳鼎盛，今季喺英超表現出色嘅賓迪基同盧卡古喺前線攻堅，又有喺燕豪芬同卡利亞里都有優異表現嘅梅頓斯同尼恩高蘭負責支援，加上車路士夏薩特同熱刺迪比利等大將都有入選，球隊攻力相當強勁。

斯洛伐克喺世盃外圍賽歐洲區暫列G組第3，下月底主場對立陶宛一役非勝不可，今仗雖然作客比利時，但會嘗試演練進攻陣式，球隊徵召大部分資歷較深球員列陣，首席射手維迪同拿玻里猛將咸錫都會對主隊防線構成威脅，Anton相信比利時會贏但亦會失波，捧大盤。