國足腳軟難抗沙特

猪拉多纳

衰慳皮遊11粒鐘飛機河

今晚亞洲盃外圍賽揭開戰幔，最矚目嘅當數C組賽事沙特阿拉伯主場迎戰中國。國足有主力中堅馮瀟霆因傷缺陣，防線立立亂，加上為咗慳錢，結果用咗11個鐘先去到沙特，球員攰爆，面對有新帥效應嘅沙特阿拉伯，都好難全身而退，主W捧得過。

（中央5台周四凌晨1時15分直播）

中國對今次亞洲盃非常重視，由於中超未開咧，佢哋上個月拉隊去咗西班牙集訓，可惜冇乜改善，之前熱身賽輸畀阿曼表現醜死怪。原本國足由阿曼去沙特只需兩粒鐘，但為咗慳錢，佢哋選擇從卡塔爾首都多哈轉機，足足花咗11個鐘先到達，球員舟車勞頓攰到爆，甚至取消喺沙特嘅首課操練。

除此之外，中國今仗亦有蒿俊閔、張琳芃及馮瀟霆等傷兵，其中馮瀟霆肯定唔出得，冇咗呢位主力中堅壓陣，被迫起用許博與趙鵬扼守中路，唔係好穩陣。相反沙特剛炒咗前巴塞教練列卡特，但新帥盧比斯卡路看來更了解球隊狀況，仲召咗伊蒂哈德射手夏沙斯，該國足總亦下達必殺令，今仗一定要攞頭彩，寧捧有新帥效應嘅沙特主W。
巴林炒起也門

另外D組有場強弱懸殊賽事，也門近八場輸晒之餘，只係入得兩粒，見到都唔開胃！巴林於上月嘅海灣盃取得殿軍，今仗亦徵召射手鴨都拉迪夫及鴨都拉奧馬入伍，攻力有保證，於中立場阿聯酋面對冇骨魚腩嘅也門勝算甚高，「讓球客勝」咪走雞。

（周三晚11時15分開賽）