車仔上紐爆格

猪拉多纳

丹巴巴亞倒戈熟路

「新魔獸」丹巴巴亞倒戈反咬「喜鵲」！英超是日焦點大戰紐卡素主場決戰車路士，「喜鵲」喺冬季轉會窗放咗王牌前鋒丹巴巴亞畀車仔，呢位塞內加爾射手今季包辦紐卡素超過四成聯賽士哥，「喜鵲」即使簽埋成堆法國兵都補唔番，此消彼長之下，車仔優勢明顯，有力反客為主，捧客Ｗ！

（有線200及300台周六晚11時直播）

紐卡素上月留唔住丹巴巴亞，對佢哋打擊好大，「喜鵲」目前喺聯賽取得卅個入球，丹巴巴亞獨佔十三粒，一個人佔超過四成士哥，反映班波完全倚重呢位球星，如今佢掉轉槍頭，將成球隊心腹大患。紐卡素教頭柏杜喺冬季轉會窗簽咗五個法國新兵，大部分係中後場球員，「老翻韋拉」穆沙施素高上次踢落對辦，但前線冇乜猛人加盟，仍要靠柏比斯施斯爭取士哥，唔算好勁。
紐卡素往績輸蝕

車路士主帥賓尼迪斯始終寵信王子費蘭度托利斯，近期冷落咗丹巴巴亞，但王子連場踢落冇大起色，今次對住紐卡素係時候畀丹巴巴亞擔正，依家已經搭好晒個棚，做唔做到英雄就要睇佢造化喇！車仔今戰續有進攻中場夏薩特停賽，組織力下降，更適合掟啲高波畀丹巴巴亞去爆，佢哋上場對雷丁贏住兩粒被追和，錄得作客三連和，再唔贏唔掂，今次實會打醒十二分精神。

睇埋往績，車路士近四次作客紐卡素三勝一和，包括上季淨勝3比0。兩軍首循環對戰時，車仔喺主場上半場入晒兩球贏2比0，當時「喜鵲」有丹巴巴亞幫手都入唔到波，今次佢仲要倒戈出戰，一來一回，紐卡素肯定更難打，捧車路士！