西維爾新帥有料「體」高一線

猪拉多纳

西班牙盃4強今晚上演馬體會主場對西維爾嘅首回合賽事，論牌面，今季主場無敵嘅馬體會理應秤先，但自首席射手法卡奧養傷後明顯跌Watt，相反西維爾喺新帥艾美利帶領下至今4戰未逢敗績，受讓一球我捧2.15倍「讓客」。（now632台周五清晨5:00直播）
馬體會冇法卡奧死晒火

馬體會今季各項賽事喺卡達朗主場錄得驚人嘅17戰全勝紀錄，氣勢真係勁爆，但睇亞洲盤讓半一都有1.9倍高水，其實唔算得太具信心。事實上，冇咗法卡奧嘅佢哋，幾乎係冇咗接近一半火力，單睇佢哋近2仗分別只係踢和貝迪斯同輸畀畢爾包，就知馬體會依家有幾大鑊。

西維爾得正選門將柏立係唯一傷兵，副選迪亞高洛迪古斯賣咗去皇馬，上輪聯賽佢哋已經焗住起用新仔古斯達，不過面對住CF格蘭納達一樣能夠保持不失，睇嚟信得過。何況佢哋由葡超布拉加借嚟嘅龍門比圖都已經報到，主帥艾美利大把選擇。

講開艾美利，呢位前華倫教頭上任以嚟大獲好評，前鋒尼格度就大讚佢有料，激得起班波鬥心同踢法變得更進取，挾住4場不敗走勢而臨，受讓抵玩。
盃賽賽制

自由盃：採主客兩回合淘汰制，今輪為外圍賽次回合，若總比數相同，作客入球較多一隊晉級，再和則於次回合後隨即互射12碼決勝。

荷盃：今輪為8強戰，以一場過分勝負，若法定時間內打成平手，需加時作賽，再和就互射12碼決勝。

西盃：採主客兩回合淘汰制，今輪為4強首回合，若總比數相同，作客入球較多一隊晉級，再和則於次回合後加時作賽。若加時入球數字相同，客隊憑作客入球優惠晉級，若加時沒有入球，則互射12碼決勝。

註：周五賽事於今日中午12時起受注，賠率於開售時提供。