紅魔誓破聖人金身

猪拉多纳

力爭聯賽主場9連勝

「聖人」修咸頓自拆禮物日起脫胎換骨，就連新帥普捷天奴處子登場亦有個好開始，不過今晚喺英超快車作客遇上蓄銳而臨嘅「聖人剋星」曼聯，狀態幾好都勢係假，曼聯1.55倍「讓球主勝」依絲執。

（有線200及300周四凌晨4:00直播）
修咸頓近5次主場對賽輸晒

相對喺英足盃出局嘅熱刺、利物浦，險勝嘅曼城、阿仙奴，日前曼聯大炒富咸晉級就有霸氣得多，費Sir喺鎖定勝局後，仲畀傷愈冇耐嘅香川真司後備落場提升比賽狀態，至於尹佩斯同里奧費迪南等主力亦全程齋做後備，意圖再明顯不過，就係為今場鋪路。雖然費查受傷病困擾缺陣，不過實際影響輕微，兼且成班「魔將」養精蓄銳，要大炒「聖人」締造聯賽主場9連勝氣勢，可謂毫無難度。

修咸頓喺聖誕節好似收到份「不敗金身」做禮物咁，自拆禮物日開始，已經連續6場聯賽未輸過，當中仲不乏阿仙奴同車路士等實力分子，就連普捷天奴接替艾堅斯出任主帥後，首戰守和愛華頓亦叫做有個好開始。不過睇嚟呢個「不敗金身」都係時候失效喇，事關佢哋近5次主場迎戰曼聯輸晒都不特止，仲要喪失14球，有主場之利都畀曼聯格食格到咁，今晚仲話要掉轉頭作客奧脫福，真係想輸少粒都難！