紐卡素快車發維

猪拉多纳

為護級推動法國大革命

英超球會紐卡素為護級進行「法國大革命」，於冬季轉會窗連簽五件法國兵，隊內法語系球員勢力膨脹，班新兵有同鄉幫手，唔使用好多時間適應，今次周中快車作客對住打盃賽打到謝晒嘅阿士東維拉係時候騷哥利，平手盤捧「喜鵲」！

（有線204及304台周三凌晨3時45分直播）

紐卡素自拆禮日起聯賽連盃賽六戰五敗，聯賽跌至降班區邊緣，教頭柏杜怕落鑊，轉會窗重開後瘋狂班救兵，連簽五個法國兵幫手，當中以「老翻韋拉」穆沙施素高最有分量，箭頭高法蘭亦可增強進攻火力。柏杜之前重用賓艾化及卡比耶等法國兵效果理想，梗係食住條水繼續再用呢條方程式啦！

「喜鵲」執埋一堆新球員，當然要時間適應同調整，好在現時一隊法國兵多達十人，仲多過英格蘭球員，成班法國兵同聲同氣，場內建立默契快，場外亦可極速融入英倫生活，預期好快可起作用。紐卡素唔係冇隱憂，防線重心高洛仙尼冇錢買斷自己份約被迫留隊，但話晒都係職業球員，落到場都會盡力作戰。
維拉輸到冇晒信心

另一邊廂，同樣要護級嘅維拉於轉會市場冇乜動作，計人腳班波唔曳，弗爆射手賓迪基仲成為搶手貨，衰在大軍於聖誕新年快車期輸到冇晒信心，近期仲接連於聯賽盃同足總盃被兩支較低組別球隊踢出局，可謂低處未算低。教頭林拔冇乜計仔，短期內仍難反彈，今次即使主場出戰亦冇優勢，再反多鋪！