西維爾主攻大盤「格」

猪拉多纳

換帥醒神 火力重現

今輪西甲壓軸尾場，西維爾主場對CF格蘭納達，西維爾自前華倫西亞教練艾美利中途接手後，三場未輸過，攻擊鐵三角尼格度、捷西斯拿華斯、拿傑迪錫逐漸回勇，理應秤先少少，不過CF格蘭納達為咗護級，已經豁出去進攻，近四仗搶到七分之餘，其中三場開大，證明呢招有效，既然兩軍咁進取，捧入球大更好路。

（周二凌晨4時30分開賽）

今季華倫西亞踢得咁曳，一定會好懷念前教練艾美利，不過艾帥太過重攻輕守，令佢唔到半季就畀俄超莫斯科斯巴達炒魷，好彩西維爾一月解僱咗舞唔掂隊波嘅米高，即刻搵艾美利嚟救火。由於掃走犯眾憎嘅米高，眾將自然識做冧艾帥，上周中西盃八強次回合大勝薩拉戈薩4比0，中鋒尼格度唔單止梅開二度，仲助攻拿傑迪錫建功，加埋雷恩斯同後備殺手迪摩奴常有驚喜，令西軍火力重現。
格蘭納達護級豁出去

上半季渾渾噩噩嘅CF格蘭納達，近期終於醒晒，自知久守必失難有作為，倒不如豁出去進攻博一博，近四聯賽豪取兩勝一和一負，其中三場開大，而輸畀華倫嗰場仲要係打少個之下一度領先，睇得出隊波勁有heart。不過主隊仍有新帥效應，CF格蘭納達亦要為護級拚盡搶分，看來都係鬥攻格局，揀大盤啦！