史特加同拜仁駁火

猪拉多纳

鋒力銳利主場夠惡

哥迪奧拿下季轉教拜仁慕尼黑，唔單止德甲球迷興奮，連唔少拜仁球員都表態期待哥帥會引入「巴塞式」足球。其實拜仁嘅火力喺歐洲已經係數一數二，同哥迪奧拿嘅進攻哲學啱晒合尺，不過始終都係下季嘅事，太早興奮對爭取佳績可能有影響，所以拜仁今晚作客硬撼史特加，小弟覺得捧1.48倍入球大更穩陣。

（有線61、64、201及204周一凌晨0:30直播）

拜仁慕尼黑可以打低曼城、車路士等豪門，邀得哥迪奧拿加盟，隊波本身打法進取肯定係原因之一，箭頭無論出馬里奧高美斯定係文迪蘇傑，入波都係易如反掌；而湯馬士梅拿、列貝利、洛賓同梳頓沙基利個個都交得扭得又射得，試問咁強大嘅火力，又有幾多隊頂得住？相信今仗即使作客都肯定會照攻，提前做多齣好戲畀未來主帥睇嘛！
拜仁領先太多易輕敵

人人都講哥迪奧拿，小弟就戥拜仁嘅現任主帥軒歷基斯無端端變咗做「大茄」唔抵。佢老哥近日都發晒脾氣，擔心班兵因為喺榜首大幅度領先容易輕敵，如果班球員真係咁嘅心態，呢場對手史特加就有運行喇！事關史特加主場夠惡，近5次主場聯賽都坐底入兩球或以上，並贏咗3場咁多，今晚有力同拜仁駁火，合力做番場「大」騷。
頂占筍盤：史特加（入球大）