基達菲走晒樣輸少當贏

猪拉多纳

皇馬、巴塞上周中喺西盃均順利過關，4強將會提早上演夢幻對決。理論上大戰當前，兩隊今輪西甲比賽應有所保留，唔會去得太盡。難得死對頭巴塞不敗之身被破，近期後防穿窿，難免令皇馬對聯賽冠軍有番一絲遐想，因此今晚頭場出擊基達菲應會殺無赦。

「銀河艦隊」上周大炒華倫西亞，單係上半場已遙遙領先5球，最諷刺係後防自從一對正選中堅比比同沙治奧拉莫斯缺陣後，對上兩場反而無失過一球。至於卡斯拿斯骨折確實對皇馬後防有影響，但就為莫連奴解決咗正選門將誰屬嘅問題。至於近期又傳正、副隊長卡斯拿斯及沙治奧拉莫斯向會長佩雷斯「攤牌」，實行「有你冇我」逼莫帥下台，係真係假不得而知，但莫帥喺皇馬嘅日子應已進入倒數階段。

皇馬過往對住基達菲並冇太多着數。縱使主場勝出，但比數差距唔會太大，作客就更加經常性失分。基達菲現時位列中游，未受降班威脅，不過，佢哋自踏入12月後表現走晒樣，連埋西盃已錄得8場不勝，今晚仲有柏度利安、拿菲達同文尼受傷，而拿辛同巴拉達亦暫時離隊參加非國盃，實力更打折扣，輸少兩球都收貨。