奧咸士氣曳 紅軍遇弱發威

猪拉多纳

英格蘭足總盃第4圈激戰繼續上演，奧咸喺主場對利物浦有難。最新調查顯示，紅軍最鍾意喺英超恰弱隊，上屆又試過喺足總盃第3圈以5:1大炒今場對手奧咸，質素心理都贏晒，加上奧咸為瘦身亂炒人，士氣差成咁，根本冇力阻利物浦開1.55倍「讓球客勝」。

（now633及660台周一凌晨0:00直播）
紅軍上屆5:1炒甲組仔

截至今季英超第23輪賽事，利物浦對頭10位嘅球隊竟然得5和6負，對住尾嗰10隊則有9勝2和1負，即係話，紅軍喺新領隊羅渣士帶領下，幾乎淨係識恰弱隊。

巧合嘅係，上年利物浦喺聯賽作客淨吞曼城3蛋後，即刻喺足總盃第3圈主場以5:1大勝奧咸發威，假如相信紅軍鍾意喺弱隊身上搵自信，佢哋今晚再遇英甲仔奧咸，當然抵捧啦！

雖然紅軍季初表現相當唔掂，但其實近排已經開始搵番狀態，而且傷兵問題好番好多，主要得後衞馬田基利、荷西安歷基同門將連拿養傷，有足夠兵源進行輪換。預計羅渣士今晚會派部分副選球員擔正，不過以佢哋嘅卡士，面對甲組仔相信都可以輕易過關，特別係前鋒史杜列治加盟後火速入局，只要佢同蘇亞雷斯繼續合作，想紅軍入少粒都難。
奧咸諗縮數 領隊身兼多職

對家奧咸就認真唔抵撐，前曼城前鋒迪高夫喺2010年轉行做領隊後，冇齣好戲做過，隊長富文仲去咗南非踢非國盃。更弊嘅係，近排奧咸為咗縮減開支，炒咗助教、體能教練同預備組教練，好多嘢都要迪高夫兼顧埋，需知道佢領軍已經唔係咁叻，家陣仲要佢身兼多職，佢畀人炒睇怕只係時間問題，或者利物浦會幫手大勝一場，等佢快啲脫苦海。
奧咸主場4連敗

‧奧咸主場4連敗，期間每場失2球。

‧奧咸上屆第3圈作客以1:5不敵利物浦。

‧利物浦連續9場開入球大。

‧紅軍近12場得8勝4負，冇和過波。
睇好紅軍玩埋客客

或者利物浦仲未算全面復甦，但近7戰有5勝2負見得吓人，期間嘅5場勝仗，更加全部由半場贏到落尾，所以睇好紅軍贏波，除咗「讓球客勝」，亦可以考慮玩埋1.6倍「客客」，畢竟上年喺足總盃第3圈作客，利物浦先失波都可以喺完半場前反超前2:1，最後以5:1大勝證明質素高對手好多，不妨跟多次。
英總賽制

今輪為第4圈賽事，若法定時間內打和需擇日重賽。