弗賴堡地頭撐得過

猪拉多纳

利華作客易失波

近年德甲平均水平愈嚟愈高，唔少細球會都表現突出贏得球迷掌聲，好似弗賴堡就係今季其中一支神奇球隊。雖然球星唔多，靠嘅就係一人走多一步嘅團隊精神，成功打入聯賽榜前列，佢哋今晚主場迎戰利華古遜，憑住硬淨嘅主場有力搶分，1.5倍「讓球主勝」值得支持。（有線61、64、201及204周日凌晨1:30直播）
「勤力」主隊近9戰只負拜仁

對於唔係成日睇德甲嘅球迷，講真要數3個弗賴堡球員個名出嚟都有難度，當中比較出名嘅就係真羅辛度、莊拿芬舒密特同麥斯古斯囉！雖然名氣欠奉，好在弗賴堡班人機動性好高，戰意更加厲害，有統計顯示佢哋平均每場全隊共跑116.9公里，勤力程度全德甲排第4，難怪最近9場聯賽都只係輸過1場畀榜首拜仁慕尼黑，其他球隊要贏佢哋無咁易。

對手利華古遜嘅舒賀爾尼同傑斯寧一對箭頭的確威力十足，弊在條防線就弱啲啲，今季聯賽每場作客都有失波，兼且平均每場失接近2球，直接連累利華作客勝出率唔到5成，對住踢法非常硬淨嘅弗賴堡，失分而回絕對唔意外，捧主隊有着數呀！
頂占筍盤：弗賴堡（讓球主勝）