足總盃雙城記重賽唔奇

猪拉多纳

今晚英格蘭足總盃頭場上演「雙城記」，曼城近排贏到開巷，相反史篤城好沉，睇牌面同氣勢就好難有得鍊，但係呢項盃賽一向都係爆冷溫床，愈唔可能嘅事就愈有機會發生，睇吓史篤城有冇計仔繼續喺主場頂住「藍月亮」啦。
曼城近6次訪史篤城不勝

史篤城早前輸畀「車仔」，英超連續17次主場不敗金身被打破，其實就等如放低咗接近一年嘅主場不敗紀錄重擔，球員唔使再承受呢股無形嘅壓力比賽，自然會踢得放啲，加上近6次主場未輸過畀曼城，所以咪睇低佢哋典型英式打法嘅威力。

曼城喺新嘅一年持續強勢，照計就冇乜理由懷疑佢哋嘅贏波能力，但弊在偏偏喺呢個時候出現唔「和諧」嘅聲音，呢頭「巴神」走人唱通街，嗰頭泰維斯又失驚無神話約滿後散水，總之搞到文仙尼頭都大晒，依家離開歐洲轉會窗口關閉剩番幾日時間，講唔埋仲有新料爆，所以呢場對住主場惡霸史篤城即使贏唔到，留待重賽返自己地頭，先至收拾對手都仲可以接受。