藍月亮雙翼 洗劫史篤城

猪拉多纳

曼城今季嘅英超衞冕路唔易行，盛傳冇盃落袋即炒嘅領隊文仙尼梗要搵番啲揸拿，佢老人家前年就係靠英總發圍，當時嘅對手正正就係史篤城。雙方今晚喺英總第4圈狹路相逢，曼城當然想重溫好夢，呢支億萬大軍憑住雙翼爆發，踏入2013年後勢如破竹，造訪閘位穿窿嘅史篤城可以秤先，讓半一要上盤。

（now633及660台周六晚8:45直播）

呢場係2011年「英總決賽翻版」，當日曼城喺溫布萊憑耶耶托尼一箭定江山做低史篤城，幫曼城打破長達35年嘅錦標荒，雖然耶耶家陣踢緊非國盃，不過曼城陣營人才濟濟，佢個位有查維加西亞補上，就連傷愈嘅阿古路都話會喺今仗復任正選，拍住迪斯高或者泰維斯搵食，冇耶耶托尼？使乜驚呀！
史篤城正選雙閘打柴

同時，上場聯賽傷出嘅右閘薩巴列達，本周二已經開始踩單車同跑番步，預計可以擔正鎮守後防。最重要係佢位右路拍檔占士米拿踏入2013年後大爆發，又有助攻又士哥仲當選過MVP添，強如阿仙奴都被佢玩謝，更何況史篤城？左翼大衞施華點勁唔使比利仔多講，淨係睇呢位西班牙國腳上仗入2粒踢到曉飛，已經係入波保證啦！

主場嘅史篤城一直畀人「爛仔波」、「強隊殺手」嘅感覺，但佢哋今季冇晒驚喜，近10戰贏得1場，狀態沉到不得了。最濕滯係左、右二閘韋堅遜同「新炸彈人」梳頓仲養緊傷，意味住司職中場嘅韋赫特要客串右閘，左閘謝夫甘馬倫坐多過踢，大家都知曼城靠大衞施華同占士米拿側擊搵食，今戰史篤城閘位穿大窿，同扯白旗投降有乜分別？雙方最近一次交手，曼城就輕鬆炒史篤城3粒，以曼城家陣連續4場全勝兼不失球嘅氣勢，睇怕史篤城連蛋都未必破到！
曼城2013年4戰0失球

‧曼城踏入2013年4戰全勝1球不失。

‧史篤城近5次主場鬥曼城全開1:1波膽。

‧今戰係2011年英總決賽翻版，嗰場曼城小勝1:0封王。
英總賽制

今輪為第4圈賽事，若法定時間內打和需擇日重賽。