慕遜加柏打吡戰起「塞」

猪拉多纳

今晚重心場次係慕遜加柏主場鬥杜塞爾多夫，上季德甲殿軍慕遜加柏經歷季初大換血適應期後已逐步重返正軌，歇冬期備戰工作認真，今晚打吡戰遇上弱旅杜塞爾多夫係時候打開2013年勝利之門，1.57倍主Ｗ係信心之選，進取啲可以捧2.7倍「讓球主勝」。

（周六晚10時30分開賽）

今場喺德國北威州魯爾地區打吡，兩個鄰市距離只有24公里，雙方高層同球迷對今仗都極為重視，慕遜加柏季前流失咗馬高列奧斯、丹迪同紐斯泰達等上季絕對主力，會方雖然豪花逾3,000萬歐元補充兵力，但新兵未能迅速融入球隊，季初經歷陣痛期，寄予厚望嘅箭頭盧克迪莊季初未上力，另一重點引進嘅瑞士年輕中場格列沙加更愈踢愈沉。不過球隊底子始終夠厚，教頭法夫爾功力亦唔使懷疑，球隊喺歇冬前已見回勇，歐霸主場大炒費倫巴治同德甲作客賽和拜仁表現最為出色，連同歇冬期熱身賽，慕遜加柏自去年11月底起已保持10仗不敗，球隊今仗又可以夫添出擊，主場迎弱旅贏面實在高唱入雲。
杜塞爾多夫歇完冬冇態

杜塞爾多夫喺德甲亦有值得懷緬歷史，70年代更曾經喺歐洲舞台亮相，今季回歸德甲，首循環下半段時間表現亦已愈來愈好，不過主要都係靠主場搵食，球隊實力同兵源始終較弱，歇冬後狀態低迷，上仗主場面對護級形勢水深火熱嘅奧格斯堡都要輸波，防線更接連送禮，目前狀態同士氣都唔理想，作客面對質高一皮嘅慕遜加柏唔夠砌。
Macot推介：

慕遜加柏勝 ★★★★

禾夫斯堡下盤 ★★★

漢諾威大 ★★★