史浩克擺「大」頭轟奧堡

猪拉多纳

「荷蘭神箭」亨特拉爾復出

德甲早場直播奧格斯堡主場鬥史浩克04，兩軍歇冬後首仗都同各自對手踢到有前冇後，簡直癲鳳鬥狂龍，今晚兩軍碰頭，大家賽前都揚言加強進攻，雙方都唔會滿足和波，預期又係一場入球騷，1.8倍入球大係投X首選。

（有線61及201台周六晚10時30分直播）
奧格斯堡護級豁出去

奧格斯堡喺德甲踢咗18輪只得12分排倒數次席，落後尾4護級安全線嘅紐倫堡已經9分，形勢危殆，球隊亦已豁出去，喺歇冬前已開始場場搶攻，歇冬期更引入南韓鋒將池東沅，同陣中同鄉具滋哲組成「磁力共振」組合，歇冬後首戰作客以3比2擊敗杜塞爾多夫，終結10輪不勝悶局，雖然上仗贏波好大程度要多得杜塞爾多夫防線頻頻送禮，但本身箭頭摩達斯確實勇得交關，波到人到衝刺力強，而首度登場嘅池東沅喺盤傳射各方面亦顯示級數，球隊攻力確有所提升。以球隊現時形勢，對任何球隊攞一分亦幫助不大，主場出擊必攻，何況對手係上仗主場失咗4球，兼作客唔算叻嘅史浩克，奧格斯堡根本冇退縮嘅道理。
史浩克防線救唔番

史浩克近期比奧格斯堡更開放，皆因歇冬前連續6輪聯賽未贏過，聯賽排名已退居第5，連爭取下屆歐聯入場券嘅會方最低目標都危危乎，當然急於搶分，上輪次循環揭幕戰一開就同漢諾威合演經典戰役，史浩克由5位不同球員取得入球，最終險勝5比4，今仗球隊更有首席射手「荷蘭神箭」亨特拉爾停賽期滿復出，教練贊斯基拿索性擺大頭，由佢同馬利卡合演雙箭頭攻堅。

史浩克質素絕對在奧格斯堡之上，今場贏面稍高，但自從後防大將柏柏杜普路斯因傷長抖後，根本搵唔到足以代替佢嘅中堅，搞到防線極唔穩陣，佢哋近6輪聯賽場場入得失得，今晚面對唔會縮嘅奧格斯堡，客Ｗ同入球大賠率唔差得幾多，當然捧入球大更划算。