史篤城受讓起筷

猪拉多纳

主場不嬲唔赦曼城

是日英格蘭足總盃第四圈頭場上演2011年冠軍翻版戰，史篤城主場火併曼城，當年曼城憑耶耶托尼一箭定江山奠勝，但呢位球星依家踢緊非國盃，冇埋呢個硬淨中場，對住史篤城班爛仔真係唔夠搶。史篤城殺上英超後主場六戰曼城不敗，完全剋死對手，唔知個驚字點寫，受讓半一必捧下盤！

（now 633及660周六晚8時45分直播）
曼城缺耶耶惡唔出

曼城2011年喺足總盃決賽戰勝史篤城捧盃，成功結束35年錦標荒，逐步走上英超班霸之路，嗰場波佢哋搏到75分鐘先憑耶耶托尼搞掂對手，實在贏來不易。

不列坦尼亞球場向來係曼城凶地，史篤城喺08至09季度起參戰英超，連盃賽至今主場六戰曼城取得一勝五和，對上五次碰頭都踢成一比一，曼城家陣冇埋耶耶托尼，喺中場爭奪戰唔單止冇優勢，分分鐘唔夠搶，到時前線阿古路及泰維斯等缺乏供應，幾射得都冇用。
史篤城頂得又撞得

相比起11年足總盃決賽陣容，史篤城保留大部分主將，個別位置仲升咗呢，由比高域取代蘇連遜把關更加穩健，中場加入搶得之人尼桑斯，同時有埋左腳王查理阿當校炮，真正做到粗中帶幼，家陣唔係一味死斬個波埋去湧，好難對付。史篤城前面無論用長人高治或黑人中鋒堅韋尼鍾斯都係咁頂得，加上勤力王約拿芬禾達斯不斷走位竄擾，同埋剛開齋嘅奧雲做後備殺手，成班波搶得衝得撞得，今季聯賽連盃賽十三場主場只輸一場，確實硬淨到不得了。

曼城近況好勇五戰全勝，對上四場冇失波，佢哋喺歐聯提早出局，聯賽爭標形勢被動，足總盃成為季內重要目標，爭勝決心好大。不過，想贏唔代表一定贏到，曼城去親史篤城都冇運行，今場仲要讓到半一，個盤真係非常唔抵玩，投X首選下盤，可博埋一比一波膽。