蜜蜂兵拆「紐」省招牌

猪拉多纳

高普落柯打主場開殺戒

上星期德甲歇冬後重開即重現班霸本色嘅多蒙特，今晚返到西法倫主場迎戰弱旅紐倫堡，撞啱客隊換完新帥排陣立立亂，要大勝根本冇難度。最緊要係主帥高普已經落咗格殺令，話明要省番靚個主場招牌，同埋要搶分鎖定下屆歐聯資格，今場肯定唔留手，「蜜蜂兵團」1.46倍「讓主」咪嫌熱，玩單頭同過關都一樣穩陣呀！

（有線64及204、廣東體育周六凌晨3:30直播）
多蒙特搶分爭歐聯入場券

目前排喺德甲聯賽榜第3位嘅多蒙特，老實講落後「一哥」拜仁成12分，要從後反先的確唔易。不過以為佢哋下半季會放軟手腳，專攻歐聯咩？力奇又唔完全同意。冇錯，「蜜蜂兵團」打歐聯的確要專心，但依家佢哋喺積分表只係多第4位法蘭克福3分，下季直接進身歐聯分組賽資格仲未穩陣o架，一陣因小失大，爭盃爭唔成，下季仲搞到要踢歐聯外圍賽或轉踢歐霸盃咪搵嚟搞！

再者，以佢哋班波陣容，包括馬里奧葛斯、馬高列奧斯同哥斯基奧斯等嘅超強進攻組合，根本就係實力超班，依家仲話有舊將紐尼沙軒回歸，嚟緊會逐漸增加上陣時間，主帥高普大把籌碼喺手，要贏幾多有幾多啦！仲有呀，高普賽前提醒班球員，上半季佢哋喺主場踢8場只得14分，表現其實令球迷好失望，佢話想將西法倫球場變番做人見人怕嘅主場，班球員今晚肯定識做啦！
紐倫堡換帥立立亂

紐倫堡呢邊，聖誕節前宣布主帥赫基過檔禾夫斯堡，球隊就即刻提升U23教練韋辛加嚟揸Fit。咪話力奇睇小佢唔夠經驗，拍埋高普就肯定差幾班。上輪佢首度正式領軍，對住漢堡踢和1:1算唔差，不過佢當日就貶咗上半季常規正選日本球星清武弘嗣做後備，事後先話後悔，今仗又會擺番佢做正選，排陣立立亂冇信心，就算話今場佢哋個正選門將舒希化及時傷愈復出，中堅柏尼爾遜感冒又趕得切好番，睇怕都頂唔到幾多球。
紐倫堡作客火力最弱

‧多蒙特近3季主場全勝紐倫堡，入8球未有失波。

‧紐倫堡今季客場9戰僅入7球，為全德甲作客火力最弱球隊。

‧中場馬高列奧斯今季聯賽入7球，有5球係首名入球。
多蒙特猛火博半場大

「蜜蜂兵團」火力強大係人都知，但最令力奇欣賞係佢哋永遠鬥志十足，鍾意由一開波就搶攻，所以今場波除咗「讓球主勝」外，個2.05倍「半場大」同樣抵玩。其實佢哋近4場正式比賽都係開得出「半場大」，以佢哋近排個入球強勢，要半場入2粒有幾難？

猪拉多纳