埃塞俄比亞受讓爆「基」

猪拉多纳

非洲國家盃C組第二輪賽事展開，埃塞俄比亞會同布基納法索交手，埃塞俄比亞世界排名係今屆參賽球隊中最低，但首戰踢落虎虎生威，完全唔似魚腩，佢哋班球迷仲當正係自己地頭大吵大鬧兼掟嘢，聲勢浩大，唔赦布基納法索，今場捧「讓球客勝」！

（now 676周六凌晨2時直播）

埃塞俄比亞足球隊名不經傳，原來好鬼娛樂性o架喎，首場分組賽先有門將達斯維使出功夫腿飛腳踢對手，最後自己被抬住離場兼領紅，嚟緊要停賽兩場。另外，佢哋班球迷都好癲，瞄住對手球員瘋狂掟嘢，連嘈爆樂器Vuvuzela都掟埋落場，結果累埃國足總畀非洲足協罰款5,000美元。撇開呢啲騎呢嘢，埃塞俄比亞踢落唔曳，雖然世界排名110位，但普遍波底唔錯，傳送準繩度高，而且夾得好熟，最重要係有鬥志，上場打少個照樣搏到盡逼和贊比亞。布基納法索級數唔及贊比亞，讓波絕對唔抵玩，呢場博「讓球客勝」。