巴塞半場勝反擊馬拉加

猪拉多纳

今屆西盃8強次回合好戲在後頭，衞冕嘅巴塞隆拿10日內第3度同馬拉加正面交鋒，爭逐4強最後一席。首回合馬拉加唔只最後時刻扳平２比２，手握兩個作客入球喺手，返主場一定縮住嚟踢，但唔係話你想守就守得住，特別係巴塞上仗聯賽作客被破不敗身，隊長佩奧爾省到班隊友立立令，加上形勢使然，如果想出線的話，必定一開波就喪攻對手，以佢哋急先鋒嘅作風，「半場勝」有1.77倍值博。

（now 632周五清晨5時直播）

馬拉加首回合作客2比2逼和巴塞，今仗就算打和0比0或1比1，都可憑較多作客入球晉級，配合今季西甲最佳防線（只失17球），因此主隊今仗踢守勢波亦無可厚非。不過，面對巴塞無孔不入嘅進攻，想擺鐵桶玩死守都唔易，今仗仲有主力左閘蒙利爾停賽，防線勢必暴露更多漏洞。

巴塞上仗喺打少個之下，作客被皇家蘇斯達反勝3比2，今季聯賽首度輸波，賽後隊長佩奧爾批評球員毫無鬥志，幾好波都冇用喇。佩奧爾一向係球隊精神領袖，經佢當頭棒喝後，眾將必醒醒定定。睇番紀錄，巴塞近5次作客馬拉加贏晒之餘，有4次喺上半場已經領先，「半場勝」捧得過。