車路士半放棄史雲斯起飛

猪拉多纳

成世紀未捧過盃嘅史雲斯，爭一步就可以殺入英格蘭聯賽盃決賽，試問有邊個唔想名留青史先？揸住兩球領先優勢嘅史雲斯，今晚返主場同車路士進行4強次回合賽事，以佢哋近期嘅硬淨演出同強勁走勢，睇怕「藍戰士」都好難搵到着數，捧1.92倍「讓球主勝」。（開賽時間：周四凌晨3:45）

史雲斯10年前都仲喺非聯賽角逐，眨吓眼唔單止躋身英超，仲有機會去溫布萊爭盃，成班球員都不知幾雀躍，中場里安比頓前日就話希望揚威聯賽盃成為球會傳奇，加上上周六先喺英超大勝史篤城3:1，士氣同狀態都冇得頂。
費托連續7場食白果

計牌面當然係「藍戰士」高啲，之不過落後緊兩球加上要作客，戰意絕對係一大疑問，賽前已經有消息指領隊賓尼迪斯會輪換，派傷愈嘅隊長泰利落場操番狀態，並且收起一把年紀嘅林柏特，似乎有些少扯白旗Feel喎！

再講，車路士射手費蘭度托利斯已經連續7場食白果，造訪近4場只係失咗兩球兼有後防大將捷高復出嘅史雲斯，想平反敗局奇迹出線？發夢都冇咁早！

首回合：史客勝2:0